ദ്രുതവിളംബിതം

തുഹിനമാമലതന്നുടെപുത്രിയും

ഗുഹനുമൊത്തുഗണേശ്വരനും മുദാ

ജടയിലംബിളിചൂടിയദേവനും

പരിചൊടേ തുണയേകണമെപ്പൊഴും

ഭുവനമോഹന നിന്നുടെലീലകൾ

പറയുവാൻ കഴിയില്ലൊരനന്തനും

തവകളേബരദർശനമായിരം

മിഴികളുള്ളവനും ബഹുദുഷ്കരം

പണിയെടുക്കുക നാവിനു നിങ്ങളി-

ന്നധികവിശ്രമമേകുക കൂട്ടരേ

സമരമേതിനുമെന്നതു മാറ്റിയി-

ട്ടിനി ഗുണങ്ങൾ തരുന്നതു ചെയ്യുക

പലദിനത്തിലുമെന്നുടെയുള്ളിലാ-

യൊഴുകിവന്നിതുനിന്നുടെയോർമ്മകൾ

സുമുഖിയെന്നിലെവേദനയൊന്നുമേ-

യറിയുവാൻ കഴിയാതെ ഗമിച്ചു നീ